في ذكرى الحرب اللبنانيّة

غريب إنّو يمرق هالنهار وما نحكي شي. أو يمكن الغريب إنّو نحكي؟ ما بعرف. بس هول تلاتين سنة، يعني مش قلال. يعني قصّة جيل. يعني حياة ناس انكتبت بغير طريقة، وأشيا كتيرة كبرنا عليها من نحنا وصغار.

في كتير ناس خايفين علينا نرجع تلاتين سنة لوَرا. قال شو، خايفين إنّو نحنا، بإرادتنا، نسكن بملاجىء، وننام عصوت القذايف، ونضل حاملين كلاكيشنا ومهجّرين من بيت لبيت. صراحة، غريب إنّو يكون في إنسان طبيعي بهل دني، يختار يمشي بهل طريق. وكيف إذا كان ماشي فيها من قبل، وعارف قدّيش فيها جُوَر، وعارف إنّو بالآخِر رح توصّله عالهاوية؟

مبارح، ببرنامج "شوف الفرق وما تفرّق" (حلقة مسابقات، تنظّمت لأوّل مرّة، جمعت كل الطّوائف اللبنانيّة، لمعرفة قدّيش اللبناني بيعرف الآخَر يلّي من غير طايفته)، كانت الحصيلة إنّو العيّنة الموجودة جاوبت عن 86% من الأسئلة صحّ. يعني هالقدّ منعرف بعضنا، وهالقدّ فايتين بتفاصيل بعض، وهالقدّ متشابكين، بشي طريقة ما بعرف كيف هيّ، مع بعض.
فإذاً عشو خايفين؟ وعشو كل هالخبريّات يلي عم بيطْلَعولْنا فيها؟ وليش ضروري نلبس الطّقم يلّي فصّلولنا ياه؟

أنا كنت صغيرة أيّام الحرب. خْلِقت، ولقيتن عم يتحاربوا. مش على الدّين، لأ. ولا لأنّو كل واحد فيهم بدّو ربّه يربح. هيك، حشرونا بالنّص، وقالولنا اصطفلوا. معهم، كانت الطّاحونة بعيدة، وكلّ الطرق يلي بتوصّل عليها أصلاً مقطوعة.
واليوم، بنهار 13 نيسان 2005، مش راح طالب إنّو كلّ اللبنانيّي يختاروا درب واحدة عالطّاحون. بالعكس، بدّي إذكر لكم 18 طريق لبنانيّة مختلفة. بكل بساطة، لأنّو التّنويع أحلى بكتير:

أرمينية غريغوريّة، أرمينيّة كاثوليكيّة، إسرائيليّة، إسماعيليّة، أشوريّة، إنجيليّة، درزيّة، روم أرثوذكس، سريانيّة أرثوذكسيّة، سريانيّة كاثوليكيّة، سنيّة، شيعيّة جعفريّة، علويّة، قبطيّة أرثوذكسيّة، كاثوليكيّة ملكيّة، كلدانيّة، لاتينيّة، مارونيّة.