3.8.06

بدي... بيروت

بتعرفي شو بدي؟
الساعة 2 بعد الضهر، بدي إنزل هلأ عالسوديكو وإحضر فيلمين ورا بعض. بدي ياهن من الأفلام المغضوب عليهن .لافيهن لا خبيط ولا لبيط. بدي ياهن يكونو كئيبين. يخلصو متل ما هالدني بتخلص.
بدي أطرقها مشية من السوديكو للمتحف للبربير. ومن حد البربير بدي غـَمِّق بطريق الجديدة والسبيل لحديت ما أوصل على جامعتي.
هونيك بشتري السفير من هالبياعة الكبيرة بالعمر اللي كل مرة بلاحظ إنو عدد البسينات عندها عم بزيد.
بدي كمل بعدين ع مار الياس وإركض ورا حرامي عالموتوسيكل جرب يسرق جزدان مرا كبيرة بالعمر.
رايح إنزل صيع بالحمرا، بركي عم بسكرو قهوة جديدة..
رح كمل لتحت تحت بحري بحري وهونيك رح آخد نسكافيه من عند أنكيل ديك وأقطع الطريق لأوقف بوج البحر الأسود والرمل الضايع.
بعد بدك تعرفي شو بدي؟
بدي آخد السيارة وجرب أوصل ع بيت رفيق بالضاحية الجنوبية. رح إتبع الخريطة المرسومة على أمل إني أوصل للعنوان المطلوب. بس متل كل مرة رح لاقي الشوارع متل بعضا ورح يطلعلي مفارق خلقت مبارح وبنايات رح تطلع بكرة. بدي أوصل بعد ما تطلع روحي ولما إجي لإطلع، ما عود أعرف إطلع..
بدي وبدي وبدي..
حتى لو شوارع الضاحية انمسحت أو صارت شارع واحد وحتى لو النسكافيه طلعت منا ريحة الحريق،
لازم كون ببيروت هلأ..
مش لازم بس ما ضيـِّع الأمل
ع قولة محمود: لازم.. ربّيه
ما يروح فكرِك لبعيد.
قصدي الأمل..
عرفتيه؟

6 Comments:

At Thursday, August 03, 2006 5:28:00 AM, Blogger Hashem said...

هلال...شرّفنا عالمصيطبة واشرب فنجان قهوة...لأ مش نسكافة...وعالسطيحة نقعد...بعدين بتكفي مشوارك! آه...أنا ماني هونيك؟ وأنت يمكن...بس عن قريب إن شاء الله

 
At Thursday, August 03, 2006 9:45:00 AM, Blogger Eve said...

ou3a tkoun bil sodeco w ma tmayyel, bez3al minnak huh :) !

 
At Thursday, August 03, 2006 12:36:00 PM, Blogger Hilal CHOUMAN said...

hashem,
walla 3anna hon binn najjar.. bitsadde2?

eve,
akeed akeed :)
btw, yin3ad 3laykeh walaw inna met2akhra. bas yimkin wein ma 3am troo7eh 3am bitla2eh shmoo3 mdawwayeh.. ma heik?
:(
hope u will celebrate it in better times..

 
At Thursday, August 03, 2006 8:01:00 PM, Blogger linalone said...

w ana bayte bi Bayrouth 7add mestachfa Rizk, ye3ne 2 min from sodeka. I have there a great stay7a, yalla rje3 w men3mil meeting jdid honik:)

 
At Thursday, August 03, 2006 8:02:00 PM, Blogger linalone said...

Sodeco, sorry:)

 
At Wednesday, August 25, 2021 10:21:00 PM, Blogger yanmaneee said...

kyrie irving shoes
jordan 13
golden goose sneakers
golden goose sneakers
retro jordans
yeezy shoes
birkin bag
off white outlet
yeezy boost 350
golden goose

 

Post a Comment

<< Home