بدي... بيروت

بتعرفي شو بدي؟

الساعة 2 بعد الضهر، بدي إنزل هلأ عالسوديكو وإحضر فيلمين ورا بعض. بدي ياهن من الأفلام المغضوب عليهن .لافيهن لا خبيط ولا لبيط. بدي ياهن يكونو كئيبين. يخلصو متل ما هالدني بتخلص.

بدي أطرقها مشية من السوديكو للمتحف للبربير. ومن حد البربير بدي غـَمِّق بطريق الجديدة والسبيل لحديت ما أوصل على جامعتي.

هونيك بشتري السفير من هالبياعة الكبيرة بالعمر اللي كل مرة بلاحظ إنو عدد البسينات عندها عم بزيد.

بدي كمل بعدين ع مار الياس وإركض ورا حرامي عالموتوسيكل جرب يسرق جزدان مرا كبيرة بالعمر.

رايح إنزل صيع بالحمرا، بركي عم بسكرو قهوة جديدة..

رح كمل لتحت تحت بحري بحري وهونيك رح آخد نسكافيه من عند أنكيل ديك وأقطع الطريق لأوقف بوج البحر الأسود والرمل الضايع.

بعد بدك تعرفي شو بدي؟

بدي آخد السيارة وجرب أوصل ع بيت رفيق بالضاحية الجنوبية. رح إتبع الخريطة المرسومة على أمل إني أوصل للعنوان المطلوب. بس متل كل مرة رح لاقي الشوارع متل بعضا ورح يطلعلي مفارق خلقت مبارح وبنايات رح تطلع بكرة. بدي أوصل بعد ما تطلع روحي ولما إجي لإطلع، ما عود أعرف إطلع..

بدي وبدي وبدي..

حتى لو شوارع الضاحية انمسحت أو صارت شارع واحد وحتى لو النسكافيه طلعت منا ريحة الحريق،

لازم كون ببيروت هلأ..

مش لازم بس ما ضيـِّع الأمل

ع قولة محمود: لازم.. ربّيه

ما يروح فكرِك لبعيد.

قصدي الأمل..

عرفتيه؟