شي مش ظابط

في شي مش ظابط. خلينا نرجع لليلة سقوط حكومة عمر كرامي و"ديموقراطية" ثورة الأرز. "الديموقراطيين" ما كانوا شباب 14 آذار وقتا . اللي كانو ديموقراطيين وقتا هني هالجماعة اللي عم يقال عنن اليوم انن "الاستبداد الديني". وقتا احترمو حالن وما نزلو بشارع مضاد. تحمل عمر كرامي المسؤولية واستقال. تركولن الساحات للديموقراطية تنغل فيها.
هلأ شو؟، بطلعولك خبريات الله وكيلك مين الفهيم المسؤول عنن. قال جماعة 14 آذار قال بدن يسكرو الطرقات بالجبل وبالشمال والجنوب وبدن يمترسو بساحة الشهدا. ولو شو هالتفاهة؟ ما ببتركو لا الله ولا رحمتو تنزل علينا. شو طريق الشوف ملك الديموقراطي المستجد وليد جنبلاط (اللي اعتذر مؤخراً من بولتون لأنو مدفعيتو قصفت المطار ليلة ما وصل بيوم من إيام الحرب الأهلية عالمطار. قلو انو كان وقتا امير حرب وهلأ صار ديموقراطي – إي أهلين)؟ ولا طريق الدورة كانت من أملاك "القديس" سمير جعجع (اللي قال بالصوت والصورة عالعربية "نحنا اللي قتلنا طوني فرنجية؟" وبعدين رفض يعتذر- ولشو يعتذر ما كان عم بقاوم وعم يحمي مجتمعو المسيحي)؟ أو وسط بيروت ملك "محسوبنا" سعد (هلأ مظبوط انو العالم انَّهبت عقاراتها تحت بالبلد بسلطة القانون وبيَّعوهن ياها بالرخيص بس شي ومنو كمان)؟
جماعة 8 آذار صفو اليوم رمز "الاستبداد الديني" ع قولة الشهيد الحي. يعني ما بعرف مين فيه يردو عن الشعب لهالشهيد الحي. إنو إذا شهيد وإذا حي لازم يسمعنا قرف من نوع "على لبنان كذلك اختيار المجتمع الذي يريده: مجتمع ليبرالي ومتعدد او مجتمع مرتبط بفتاوى الملالي الايرانيين" كل يوم؟؟ ولي خيي اعتمدو يا جماعة حزب الله وأمل وعون لبنانيين يا إيرانيين وسوريين. انو ما بتظبط معي بالنهار يكون بري رئيس وطني وعشية أداة سورية إيرانية. مش ظابطة. ما بتخرط عقل. يا هيك يا هيك. مش قوس قزح هوي. ولك حتى القوس قزح حردان وما بدو يبيِّن بلبنان.
بعدين تعا لهون وبالعودة لتصريحك الشهير عن "القحبة اللي بتحاضر بالعفة"، عم تحاضرلي عن "الاستبداد الديني" ع اساس جنبلاط ما خصو فيه بطايفتو؟ يا خيي. خدني ع قد عقلاتي، وجاوبني.
لك اتركوا الجماعة ينزلو عالشارع. هني تعهدوا انو المظاهرات ح تكون سلمية وإذا صار شي هني المسؤولين وانا اول مين ح ينعفهن هون ساعتها، ومش رح يخلي ويبقي فيهن. بس دخيل عرضكن، ما تركبونا بصيغة "الانقلاب السوري الايراني". يعني انتو لما اسقطتو حكومة كرامي مرتين (جزء منكن مرة بدواليب محروقة بأول التسعينات ليجي المنقذ الكبير والمرة التانية مجتمعين بمنامة بوسط البلد مدعومة من برة) ما كنتو عم تعملو انقلاب؟ ولي خيي الانقلاب ما بصير يكون ديموقراطي؟ ولاّ اللي بيمشي معكن ما بيمشي مع التانيين؟ الجماعة طالبو بحكومة وحدة وطنية بدون ما يلغو حدن، ما عجبكن. قالولكن نحنا مع المحكمة، تعو نقعد لننقاش التفاصيل، ركضتو متل الولاد وأقريتوها بدونهن. هلأ صار بدن انتخابات مبكرة، وبحقلن مع كل تيسنتكن. ان كنتو واثقين كتير من حالكن ع شو عم تخرو قصب؟ يلا عالانتخابات ما دام انتو الاأكثرية. فرجوهن كيف الشعب ح يجدد "إيمانو فيكن".
وللأستاذ السنيورة، رسالة خاصة كتير. يعني أنا استمعت لخطاباتك المؤثرة ومتابعها منيح. بس انتبه لما بيكترو الخطابات المؤثرة بصيرو روتين، بخف التأثير وما بتعود مؤثرة . يعني الله وكيلك كبسة زر بالريموت كنترول ممكن تعزلك لنهاية خطابك. اللي بدي قلك ياه، انو لحظة ما ودعت بيار الجميل قلتلو يسلم ع الشهدا. بس حضرتك نقيت الشهدا. يعني بالنسبة لإلي ما في شهيد باب أول وشهيد باب عاشر. كان الأولى فيك تتذكر شهدا حرب تموزوانت وعم تودع بيار، هيك بصير عندك "كم ونوع" من الشهدا.

دخلك ما كان لازم تعمل شي خطاب متلفز لما صار اللي صار بالأشرفية وبزقاق البلاط وبالبسطة وع مقبرة الشهدا وع كركول الدروز؟ ما كانت بتحرز؟

ما بأى يظبط تغليف الحكي. يعني ما بينفع انت تكون مهذب وسعد ما معوَّف حدن.
ما بينفع تكون مع المقاومة وجماعتك عم بكرمو بولتون أو عم ياكلو سندويشات مع كوندي. لك خلينا نفترض إنو أبدو احتجاجن وقتا، ولو حدن بيبدي احتجاجو مع سندويشات أو بتكريم أو مع بوسات عالخد. انو ما بصير دعم المجتمع الدولي من دون دعوة بلير أو بوسة كوندي او تكريم بولتون؟ ما بصير عالتلفون؟ ولك ما إنتو ربا مع ديبلوماسية الهاتف، ع شو نسيتوها هلأ؟